పారిశుద్ధ్య కార్మికుడి నుండి చండీగఢ్ మేయర్ దాకా.. ఓ స్వయంసేవక్ ప్రస్థానం 

చండీగఢ్ నగరానికి చెందిన రాజేష్ కాలియా వీధుల వెంట ఉన్న చెత్తను సేకరించి, దాని విక్రయం ద్వారా వచ్చిన చిరు సంపాదనతో జీవనం సాగించేవాడు. వాల్మీకి వర్గానికి చెందిన వీరి కుటుంబం 1977లో చండీగఢ్ వచ్చి స్థిరపడింది. తండ్రి కుందన్ లాల్ పారిశుధ్య కార్మికుడిగా పనిచేసేవారు. చాలీచాలని సంపాదనవల్ల వారి ఇల్లు గడవటమే కష్టంగా మారింది. దీంతో రాజేష్ ప్రతిరోజూ పాఠశాల నుండి వచ్చీరాగానే  తన ఇద్దరు సోదరులు, నలుగురు సోదరీమణులతో కలిసి వీధుల్లోని చెత్త సేకరించి విక్రయిస్తూ కుటుంబానికి ఆసరాగా నిలిచేవారు. ఈక్రమంలో రాజేష్ 12వ తరగతిలో ఉండగా అతడికి రాష్ట్రీయ స్వయంసేవక్ సంఘ్ తో ఏర్పడిన అనుబంధం జీవితాన్ని మలుపుతిప్పింది. సంఘ్ నేర్పిన నిబద్ధత, సంస్కారం, క్రమశిక్షణలను తప్పనిసరిగా పాటిస్తూ ఉండేవాడు.

గత సంవత్సరం చండీగఢ్ నగరంలో చెత్తను సేకరించే కాంట్రాక్టుని అప్పటి కలెక్టర్ ఒక ప్రయివేటు సంస్థకు అప్పగించడం పట్ల స్వచ్ఛ కార్మికుల్లో తీవ్రమైన వ్యతిరేకత వచ్చింది. ఈ సందర్భంగా జరిపిన ఆందోళనలకు రాజేష్ నేతృత్వం వహించారు. దీని ద్వారా అతనిలోని నాయకత్వ లక్షణాలు వెలుగుచూశాయి. తాజాగా నగరంలోని 7వ వార్డు నుండి బీజేపీ తరఫు నుండి  పోటీ చేసిన రాజేష్ కాలియా 27 ఓట్లకు గాను 16 ఓట్లు సాధించి చండీగఢ్ మేయర్ పీఠాన్ని అధిష్టించారు.

రాజేష్ కాలియాకు ముగ్గురు కుమార్తెలు. వీరిలో ఒకరైన బీబీఏ విద్యార్థిని నిషా తన తండ్రి గురించి చెబుతూ కుటుంబాన్ని పోషించడానికి తన తండ్రి  ఎంతో కష్టపడ్డాడని, ఆయన కుటుంబం కోసం అవసరమైన సందర్భాల్లో ఆటో రిక్షా కూడా నడిపేవారని గర్వంగా చెబుతుంది.