నాగ్‌పూర్: సామాజిక సమరసత అనేది వ్యూహం కాదని, జీవన విధానమని ఆర్‌ఎస్‌ఎస్ సర్ కార్య‌వాహ శ్రీ దత్తాత్రేయ హోసబాలే జీ అన్నారు. అందరినీ ఏకతాటిపైకి తీసుకొచ్చి సామాజిక పరివర్తనకు దారితీయడమే ఆర్‌.ఎస్.ఎస్ లక్ష్యమ‌ని, సమిష్టి కృషితోనే మార్పు సాధ్యమ‌ని, ఆ విధంగా అన్ని వర్గాలను ఏకం చేయగలదన్న విశ్వాసం ఆర్‌ఎస్‌ఎస్‌కు ఉందన్నారు. నాగ‌పూర్‌లో మార్చి 15 నుంచి 17 వ‌ర‌కు మూడు రోజుల పాటు జరిగిన అఖిల భారతీయ ప్రతినిధుల సభలో చివ‌రి రోజు ఏర్పాటు చేసిన విలేకరుల సమావేశంలో ఆయన మాట్లాడారు.
అయోధ్య‌లో రామలల్లా ప్రాణ ప్రతిష్ఠ చారిత్రాత్మక సందర్భం వల్ల సమాజంలో చురుగ్గా పాల్గొనడం అందరికీ విస్తృతంగా అనుభవంలోకి వచ్చిందని ఆయన ఉద్ఘాటించారు. ఈ సంద‌ర్భంగా మీడియా ప్రతినిధులు అడిగిన ఒక ప్రశ్నకు ఆయన సమాధానమిస్తూ ఎన్నికలు ప్రజాస్వామ్యానికి పెద్ద పండుగ అని, దేశ ప్రజాస్వామ్యాన్ని, ఐక్యతను బలోపేతం చేయడం, ప్రగతి వేగాన్ని కొనసాగించడం చాలా అవసర‌మ‌న్నారు. ఆర్‌ఎస్‌ఎస్ స్వయంసేవకులు వంద శాతం పోలింగ్‌పై అవగాహన కల్పిస్తార‌ని ఆయన పేర్కొన్నారు. శత్రుత్వం, వేర్పాటువాదం లేదా విభజన ప్రయత్నాలు లేదా ఐక్యతకు విరుద్ధమైన అంశాలు ఉండకుండా సమాజం అప్రమత్తంగా ఉండాల‌న్నారు.
రాష్ట్రీయ స్వయం సేవక్ సంఘ్ కృషి దేశవ్యాప్త జాతీయవాద ఉద్యమమ‌ని, మ‌నం ఒకే దేశానికి చెందిన ఒక ప్ర‌జ‌లమ‌ని ఆయన అన్నారు. 2025 విజయ దశమి నాటికి పూర్ణ నగర్, పూర్ణ మండల్, పూర్ణ ఖండ లక్ష్యాన్ని సాధించడానికి సంఘం రోజువారీ శాఖలు, సాప్తహిక్ మిలన్‌లను పెంచే దిశ‌గా ప్ర‌ణాళిక ప్ర‌కారం పని చేస్తోంద‌న్నారు. నేడు RSS పని ప్రభావం సమాజంలో కనిపిస్తోందని, సంఘం పట్ల సమాజానికి ఉన్న అనుబంధానికి, స‌హ‌కారానికి సంఘం ఎప్ప‌టికీ కృతజ్ఞతా భావంతో ఉంటుంద‌ని పేర్కొన్నారు. పర్యావరణ పరిరక్షణ, సామాజిక సమరసత వంటి కీలక అంశాలు ఏ ఒక్క సంస్థకు మాత్రమే కాకుండా మొత్తం సమాజానికి సంబంధించినవని ఆయన సూచించారు. సమాజంలో ఇప్పటికీ కొన్ని చోట్ల సామాజిక వివక్ష, అంటరానితనం క‌నిపిస్తున్న‌ద‌ని, పట్టణ ప్రాంతాల్లో వీటి ప్రభావం చాలా త‌గ్గింద‌న్నారు. బావులు, చెరువులు, దేవాలయాలు, శ్మశాన వాటికలకు సంబంధించి సమాజంలో ఎలాంటి వివక్ష ఉండకూడద‌న్నారు.
మరో ప్రశ్నకు సమాధానమిస్తూ, సందేశ్‌ఖాలీ ఘటనలకు పాల్పడిన వారిని కఠినంగా శిక్షించాలని డిమాండ్ చేస్తూ బాధిత మహిళల ప్రతినిధులు భారత్ రాష్ట్రపతిని కలిశారని, దీనికి అంద‌రూ స్వయంసేవకులు, సంఘ ప్రేరేపిత సంస్థలు మద్దతు ఇస్తున్నాయని ఆయన అన్నారు.
మైనారిటీ అనే పదాన్ని విస్తృతంగా ఉపయోగించడంపై, రాజకీయాల్లో మైనారిటీని ఆర్‌.ఎస్.ఎస్ వ్య‌తిరేకిస్తుందని ఆయన నొక్కి చెప్పారు. రెండవ సర్ సంఘ‌చాల‌క్ నుండి, సర్ సంఘ‌చాలక్‌లందరూ ముస్లింలు, క్రైస్తవులతో సమన్వయం కోసం పనిచేశార‌ని ఆయన పేర్కొన్నారు.
మణిపూర్‌లో ఇటీవలి సామాజిక సంఘర్షణలు చాలా బాధాకరమని, ఈ గాయాలు చాలా లోతైనవన్నారు. ఆర్‌.ఎస్.ఎస్ కృషి వల్ల ఇరు వర్గాల నేతలతో మాట్లాడి పరిస్థితిని సాధారణీకరించేందుకు ప్రయత్నాలు చేశామని, అది సత్ఫలితాలను ఇచ్చిందని, అయితే ఆ ప్రయత్నం కొనసాగించాల్సిన అవసరం ఉందన్నారు.
మూడు రోజుల పాటు జరిగిన వార్షిక అఖిల భారతీయ ప్రతినిధి సభలో దత్తాత్రేయ హోసబాలే జీ మళ్లీ సర్ కార్య‌వాహ‌గా ఎన్నికయ్యారు. తదుపరి మూడు సంవత్సరాలకు (2024- 2027) సర్ కార్య‌వాహ‌గా మళ్లీ ఏకగ్రీవంగా ఎన్నికయ్యార‌ని ఈ విషయాన్ని అఖిల భారతీయ ప్రచార్ ప్రముఖ్ సునీల్ జీ అంబేకర్ ప్రకటించారు.
ఆరుగురు సహ సర్ కార్యవాహ‌ల నియామకం
రాష్ట్రీయ స్వయంసేవక్ సంఘ్ కొత్త కార్యవర్గంలో, మాననీయ సర్ కార్య‌వాహ దత్తాత్రేయ హోసబాలే జీ 2024-27 కాలానికి ఆరుగురు సహ సర్ కార్య‌వాహలను నియమించారు.
1. శ్రీ. కృష్ణ గోపాల్ జీ
2. శ్రీ. ముకుంద్ జీ
3. శ్రీ. అరుణ్ కుమార్ జీ
4. శ్రీ. రామదత్ చక్రధర్ జీ
5. శ్రీ. అతుల్ లిమాయే జీ
6. శ్రీ. అలోక్ కుమార్ జీ
