పశ్చిమ బెంగాల్‌లోని నార్త్ 24 పరగణా జిల్లాలోని సందేశ్‌ఖాలీలో హింసాత్మకంగా మానవ హక్కుల ఉల్లంఘనకు పాల్పడుతున్నారనే ఆరోపణలపై పశ్చిమ బెంగాల్ ప్రభుత్వానికి జాతీయ మానవ హక్కుల కమిషన్ (NHRC) నోటీసు జారీ చేసింది. ఈ సంఘటనపై నివేదికలను స్వయంచాలకంగా (సుమోటు) స్వీకరించిన కమిషన్, హింస, నేరానికి పాల్పడిన వారిపై తీసుకున్న చర్యలపై నాలుగు వారాల్లో నివేదికలు పంపాలని రాష్ట్ర ప్రధాన కార్యదర్శి, డైరెక్టర్ జనరల్ ఆఫ్ పోలీస్‌లను కోరింది. మహిళలతో సహా స్థానికుల్లో విశ్వాసం నింపేందుకు తీసుకున్న భద్రతా చర్యలతో పాటు హింసకు గురైన బాధితులకు ఏదైనా పరిహారం చెల్లిస్తే ఆ వివ‌రాలు నివేదికల్లో పొందుపరచాలని కోరింది.
మీడియా నివేదికలను ఉటంకిస్తూ, ఈ ప్రాంతంలోని అమాయక మహిళలను వేధించిందని, లైంగిక వేధింపులకు గురిచేస్తున్న స్థానిక వ్యక్తుల సమూహానికి ఒక రాజకీయ నాయకుడు స‌హ‌క‌రిస్తున్నాడ‌నే కార‌ణంతో గ్రామస్తుల నిరసనలకు దారితీసిందని NHRC పేర్కొంది. సందేశ్‌ఖాలీలో జరిగిన మానవ హక్కుల హింసాత్మక సంఘటనలపై వేగ‌వంతమైన విచారణ ద్వారా వాస్తవాలను నిర్ధారించడానికి తన బృందాన్ని నియమించాలని కూడా కమిషన్ నిర్ణయించింది.
