#MobLynching: రామమందిర నిర్మాణ నిధి సేకరిస్తున్న బజరంగ్‌దళ్ యువ కార్యకర్త దారుణ హత్య

తొలుత నలుగురు వ్యక్తులు ఆయుధాలతో వచ్చి.. రింకు ఇంటి తలుపులను తట్టి లోపలికి ప్రవేశించి అతని తండ్రిని, సోదరులను నెట్టేస్తూ.. విచక్షణా రహితంగా కొట్టారు. కత్తులతో పొడవడంతో తీవ్రంగా తీవ్ర రక్తస్రావం జరిగింది. అంతేకాదు.. ఇంట్లో ఉన్న ఎల్పీజీ సిలిండర్‌ను తీసి రింకు శర్మపై దాడి చేయబోతుండగా అడ్డుకున్నామని రింకు శర్మ సోదరుడు ఓ జాతీయ పత్రికకు వివరించాడు. తమపై కూడా దాడిచేస్తూ తన సోదరుడిపై తమ ముందే విచక్షణారహితంగా దాడి చేశారని, అతడు తీవ్ర గాయాలతో స్పృహ కోల్పోయి మరణించాడని భావించిన తర్వాతే దుండగులు అక్కడి నుండి వెళ్లిపోయారని, అయితే వెంటనే తాము తమ సోదరుడిని సమీప ఆస్పత్రికి తరలించామని తెలిపారు. చికిత్స పొందుతూ.. ఫిబ్రవరి 11వ తేదీన ప్రాణాలు విడిచారని కుటుంబ సభ్యులు తెలిపారు.

ఈ ఘటనపై కేసు నమోదు చేసుకున్న పోలీసులు సీసీ ఫుటేజీల ఆధారంగా దర్యాప్తు ప్రారంభించారు. ఘటనకు కారకులైన నలుగురు వ్యక్తుల్ని ఇప్పటి వరకు అరెస్ట్ చేసినట్లు పోలీసులు తెలిపారు. నిందితులను మహ్మద్‌ ఇస్లాం, డానిష్ నస్రుద్దీన్‌, దిల్షాన్‌, దిల్షాన్‌ ఇస్లాంగా గుర్తించారు.

ఘటనపై విశ్వ హిందూ పరిషత్‌ తీవ్ర ఆగ్రహం వ్యక్తం చేసింది. సంస్థ అధికార ప్రతినిధి సురేంద్ర జైన్ దీనిపై స్పందించారు. బజరంగ్ దళ్‌ కార్యకర్తపై దాడి హేయమైన చర్య అని.. రామ మందిర నిర్మాణం అనేది సుప్రీంకోర్టు ఇచ్చిన తీర్పు ప్రకారం నిర్మాణమవుతుందని.. నిధి సేకరిస్తున్న కార్యకర్తలను హతమార్చడం దారుణమన్నారు. ఘటనకు సంబంధించిన సీసీ ఫుటేజీలను కూడా జాతీయ మీడియా విడుదల చేసింది.